Астана қаласы Полиция департаментінің Экстремизмге қарсы іс-қимыл басқармасының жедел уәкілдері – полиция капитаны Ж.Қ. Сейтенов пен полиция аға лейтенанты Азат Асқарұлы Амантай Сәкен Сейфуллин атындағы №80 мектеп-гимназиясының 8–10 сынып оқушыларына «ҚР Қылмыстық Кодексінің 273-бабы бойынша терроризм актісі туралы көрінеу жалған хабарлау» тақырыбында дәріс өткізді. Іс-шараға 380-ге жуық оқушы қатысты.

Дәріс барысында полиция қызметкерлері ҚР Қылмыстық Кодексінің 273-бабының мазмұнына тоқталып, терроризм актісі туралы жалған хабар таратудың заң алдындағы салдары мен жауапкершілігін түсіндірді. Бұл бап бойынша жалған хабар тарату ауыр қылмыс саналады және кінәлі тұлғаға қылмыстық жаза, оның ішінде айыппұл, қоғамдық жұмыстар немесе бас бостандығынан айыру түріндегі жазалар қолданылуы мүмкін екендігі айтылды.

Оқушыларға жалған ақпараттың қоғамға тигізетін зардаптары, оның ішінде адамдар арасында дүрбелең тудыру, құқық қорғау органдарының ресурстарын шынайы қауіп-қатерден алаңдату сияқты салдарлары кеңінен түсіндірілді. Дәрісте нақты мысалдар келтіріліп, жалған ақпарат таратудың қылмыстық құқықтық салдары талқыланды.

Сонымен қатар, полиция қызметкерлері оқушыларды жауапкершілікке шақырып, кез келген күдікті жағдайды дереу құқық қорғау органдарына хабарлау қажеттігін айтты. Бұл дәріс құқықтық мәдениетті қалыптастырып, оқушылардың өз іс-әрекеттеріне саналы көзқараспен қарауына ықпал етеді.